“GM-Uzbekistan” акциядорлик жамиятида ёнғин ўчириш амалий тактик машқи бўлиб ўтди. Ундан кўзланган мақсад фуқаролар хавфсизлигини таъминлаш, ёнғин ёки бошқа нохуш ҳолатларда соҳавий хизмат ходимларининг биргаликдаги ҳаракатларини мувофиқлаштиришдан иборат бўлди. Омборга шартли ўт кетганида кўнгилли ёнғин ўчириш гуруҳи аъзоларнинг тўғри ҳаракатланиши, бартараф этиш бўйича олган назарий билимлари амалий кўрикдан ўтказилди. Шундан сўнг чақирув бўйича етиб келган ёнғин ўчирувчилар олов ичида қолганларни қутқаришга киришдилар ва тез тиббий ёрдам гуруҳи жабрланганларга биринчи ёрдам кўрсатди. Шартли белгилар асосида ҳаракатланган экипаж аъзолари ёнғин ўчоғига етиб келиб, уни ўчиришга киришдилар.

Амалий тактик машқда давлат ёнғин хавфсизлиги хизмати ходимлари, туман, шаҳар ва корхона қошидаги ёнғин хавфсизлиги бўлинмаларидан асосий ва махсус ёнғин ўчириш экипажлари, қўриқлаш хизмати ходимлари, фавқулодда вазиятлар бошқармаси қутқарув бўлинмаси, шошилинч тиббий ёрдам, электр, газ, сувоқова идораларидан авария қутқарув гуруҳлари, маъмурият вакиллари, корхона ишчи-хизматчилари иштирок этдилар.

Якунида барча тизим вакиллари иштирокида ўтказилган йиғинда мутахассислар қатнашчиларнинг хатти-ҳаракатларига баҳо бериб, ишчи-хизматчилар, ёнғин ўчирувчилар, қутқарув, тиббиёт ва бошқа хизматнинг йўл қўйган камчиликлари айтиб ўтилди.

Келгусида бу каби машғулотларнинг кўламини кенгайтириш орқали барча хизматларнинг ҳаракатларини талаб даражасида мувофиқлаштириш, ходимларнинг ёнғин ёки бошқа нохуш ҳолатларга тайёргарлик даражасини ошириш муҳим эканлиги таъкидланди.

Йиғилишда иштирок этган Ўзбекистон Республикаси ички ишлар вазирлиги ёнғин хавфсизлиги бош бошқармаси бошлиғининг биринчи ўринбосари Исмоилжон Шарипов профилактик тадбирларни кучайтириш, мутасаддиларнинг ҳушёрлигини ошириш, фуқароларнинг хавфсизлик талабларига амал қилиш кўникмаларини шакллантириш муҳим эканлигини айтиб ўтди. Бу борада мамлакатимиз миқёсида ўтказилаётган чоршанба – ёнғинлар профилактикаси кунида самарали иш ташкил этиш катта аҳамият касб этиши эътироф этилди.

Азизбек Ёрқулов,

вилоят ёнғин хавфсизлиги бошқармаси ходими.