Боғи Бобурга ўрнатилган катта экранга юзлаб нигоҳлар қадалган. Онлайн алоқага Германия давлатининг Вайнштефен –Триздорф университети 2-курс магистранти Жасурбек Неъматжонов алоқага чиқди:

• Барчангизни ғойибона бағримизга босиб, халқимизнинг асл байрамларидан бири билан қутлаймиз. Ҳозир Германияда қор ёғяпти, қиш нафаси забтига олган. Халқимизнинг кўнглидай иссиқ, беғубор, тафтли юртда эса баҳор, Наврўз! Чин юракдан покиза ниятларимизни йўллаяпмиз. Президентимиз омон бўлсин. Юртимиздан тинчлик, хотиржамлик, қут-барака аримасин!

Германиядан яна кетма-кет қўнғироқлар. Андижон туманида туғилиб ўсган, Андижон қишлоқ хўжалик институтини тамомлаб, ҳозир Мюнхен шаҳридаги Файрранк фирмасида фаолият юритаётган Омадбек Азизов, избосканлик, олий маълумотли мутахассис, айни пайтда Олмон диёрида менежментлик қилаётган Жавлонбек Қодировлар ҳам катта экранда намоён бўлиб, қўлларида Ўзбекистон байроғини баланд кўтарган ҳолда андижонликларга оташ қутловларини йўлладилар.

- Вилоятимизда амалга оширилаётган ижтимоий-иқтисодий, маънавий ислоҳотлар замирида қадоқ қўлли юртдошларимизнинг фидокорона меҳнатлари ётганлигини чуқур ҳис қиляпмиз. Юз-кўзидан нур ёғилиб турган юртдошларимиз билан кўришиш учун шундай имконият яратилганлиги учун вилоят ҳокими Шуҳратбек Қўшоқбоевич Абдураҳмоновга, барча фаолларга чин қалбдан раҳматлар айтамиз. Биз ҳам ҳудди Боғи Бобурда юргандекмиз. Матбуот маркази томонидан дунёнинг барча нуқталарига Боғи Бобурдан тарқатилаётган ахборотлар оқимидан баҳраманд бўляпмиз.