Иккинчи жаҳон урушида қозонилган ғалабанинг 76 йиллигини бугун ҳар бир оила, ҳар бир хонадон қайсидир маънода нишонлаяпти: кимнингдир отаси, бошқа бировининг бобоси ўша машъум кунларда олов кечиб юрган. Кимдир шаҳид кетган бўлса, яна бири фронт ортида заҳмат чеккан.

Уруш билан рўбарў бўлганлар орасида 96 ёшли Иминжон ота Темиров ҳам бор.

Самимий, болаларча беғубор, кўзидан меҳр учқунлари чақнаб турган Иминжон ота бугун фарзандлари, юзга яқин набира-ю эваралари ардоғида.

“Жамоа хўжалигида, далада ишлардим. Уруш бошландию, 17 ёшимда олиб кетишди. Жанггоҳдан саккиз йил деганда келдим. Ҳар доим қўрқувни, душманни енгганмиз, албатта, оиламизга қайтамиз, деган орзу-ниятлар билан яшадик. Тинчликнинг қадрини уруш кўрганлардан сўранг-да”, дейди у.

Иминжон отанинг айни табаррук ёшида ҳам ғайрат-шижоати, ҳаётдан умидлари ўзига яраша. Телевизор орқали янгиликлардан бохабар бўлиб туради, фарзандлари, неваралари ёрдамида кундалик матбуот нашрларида чоп этилаётган хат-хабарлар билан танишиб боради. Айниқса, яқинда давлатимиз раҳбари Хотира ва қадрлаш куни олдидан уруш фахрийларини тақдирлашга оид яна бир тарихий ҳужжатга имзо чекканини эшитиб, эътибор, эъзоз ва эҳтиромдан кўнгли тоғдек кўтарилди. Ҳар гал дуога қўл очганида юртга осойишталик, элга хотиржамлик тилаб эзгу ниятлар қилади.

Иминжон ота Темиров сингари тинчликни асраш учун тиш-тирноғи билан курашган миллатнинг асл ўғлонлари бор экан, ҳаётимиз яхшиликларга эш бўлаверади.

«auz.uz» online гуруҳи.