Лимон иссиқхоналарга одатда 3×3,4×3,5×4 схемаларда экилади. Майдондан унумли фойдаланиш мақсадида кўп ҳолларда кўчатларни имкон қадар зичроқ экишга ҳаракат қилинади. Бунда кўчатларга ихчамроқ кўринишдаги шакл бериш лозим бўлади. Лекин кўчатларни зич тарзда экиш ҳам мумкин эмас. Чунки кўчатларга қуёш нури яхши тушиши ва ўсиш жараёнида бир-бирига ҳалақит бермаслиги керак.

Лимон кўчатлари экиладиган иссиқхона тупроғи унумдор, чириндиларга бой ва ҳосилдор бўлиши жуда муҳим. Ҳар бир кўчат экиладиган жойга чириган гўнг ва тоза қумдан 20% атрофида аралаштирилса ёш лимон кўчатлари ерга яхши ўрнашиб, тез ўсади ва осон ривожланади.

Лимон кўчатларининг 1 ёки 2 йилликлари осон кўкаради ҳамда тез ривожланади. Нисбатан каттароқ 3-4 ёки 5 йиллик кўчатларнинг кўкариши ва ўсиши секинроқ кечади. Кўчатлар март ойининг охирги 10 кунлигидан бошлаб апрель ойининг 20-25 кунига қадар экилади. 1-15 апрелда экилган кўчатлар жуда яхши кўкаради.