АТРОФГА НАЗАР

ЗОМИН САЙЁҲЛИК ЗОНАСИДА ИШГА ТУШИРИЛГАН ЯНГИ ОСМА ДОР ЙЎЛИ ЕВРОПАЛИК САЙЁҲЛАРНИ ЎЗИГА ЧОРЛАМОҚДА


12.09.2023   217

Австриянинг осма дор йўллари билан боғлиқ янгиликларга ихтисослашган «Seilbahn.net» ахборот порталида мамлакатимизнинг Жиззах вилояти Зомин сайёҳлик зонасида янги осма дор йўлининг очилишига бағишланган мақола эълон қилинди.

Қайд этилишича, Ўзбекистоннинг мазкур сайёҳлик зонасида ишга туширилган осма дор йўли технологияси Швейцариянинг машҳур Bartholet AG компанияси томонидан ишлаб чиқарилган. “Бу ушбу компаниянинг техника соҳасидаги барча замонавий қулайликларни ўзида мужассам этган сўнгги ютуғи экани баробарида, Porsche Design компанияси томонидан ноёб услубда ишланган”, - деб ёзади манба.

Шуни ҳам таъкидлаш жоизки, Porsche Design қимматбаҳо аксессуарлар тайёрлаш ва ишлаб чиқариш билан шуғулланувчи Европанинг етакчи компанияларидан биридир.

«Seilbahn.net» ахборот порталида айтилганидек, Зомин сайёҳлик зонасида фойдаланишга топширилган замонавий осма дор йўлида ҳар бири саккиз кишига мўлжалланган 36 та кабина мавжуд. Ҳаракатланиш тезлиги сониясига 6 метрни ташкил этувчи ушбу дор йўли соатига 1,2 минг нафар маҳаллий ва хорижий сайёҳларга хизмат кўрсатади.

Эслатиб ўтамиз, Зомин тумани Дуоба қишлоғида қурилган дор йўли 12 та минора ва 11 та устундан иборат. Хусусан, ўн биринчи миноранинг баландлиги 35 метр, 8 ва 9 устунлар орасидаги энг катта масофа 615 метр. Дор йўлининг энг юқори қиялиги 42 даража. Унинг узунлиги эса, 2102 метрни ташкил этади. Замонавий дизайнда ишланган 36 та кабина сайёҳларга хизмат кўрсатишга тайёр. Ҳаракатнинг максимал тезлиги секундига 6 метрни ташкил қилади. Ҳаракат пайтида кабиналар орасидаги масофа 141 метр ва соатига 1,2 минг нафар сайёҳга хизмат кўрсатиш имконияти мавжуд. Шуни ҳам таъкидлаш жоизки, қуйи станциянинг баландлиги денгиз сатҳидан 1961,1 метр, юқори қисми эса 2490,6 метрни, станциялар орасидаги баландлик фарқи 529,5 метрни ташкил қилади.