Бугун Самарқанддаги Регистон ансамблининг Улуғбек мадрасасида “Туристик диққатга сазовор объектлар бутунжаҳон рўйхати”га киритилганлиги тўғрисида сертификат топшириш маросими бўлиб ўтди.

Сертификатларни топшириш маросимида Евроосиё иқтисодий ҳамкорлик ташкилоти Бош котиби Владимир Пискурев ҳамда Самарқанд вилояти ҳокими ўринбосари Рустам Қобилов иштирок этдилар.

Самарқанддаги Регистон ансамбли ва Шоҳи Зинда мажмуаси “Туристик диққатга сазовор объектлар бутунжаҳон рўйхати”га киритилди.

2017 йилнинг 7 ноябрь куни Туркия Республикасининг Анталия шаҳрида бўлиб ўтган Евроосиё Маданият, фан ва таълим кенгашининг иккинчи сессиясида “Жамиятлар, халқлар ва миллатларнинг барқарор ривожланиши учун туристик диққатга сазовор жойларни рағбатлантириш тўғрисида«ги Конвенция қабул қилинди.

Конвенцияни амалга ошириш доирасида Туризмнинг жозибадорлиги ва туризмни барқарор ривожлантириш бўйича халқаро қўмита тузилди.

Халқаро қўмита фаолиятининг асосий масалаларидан бири туристик диққатга сазовор жойларни оммалаштириш, жамиятлар, халқлар ва миллатларнинг барқарор ривожланиши манфаатлари йўлида туристик ҳудудларни тарғиб қилишдан иборат.

Халқаро қўмитанинг фаолияти халқаро, мустақил, нодавлат, носиёсий характерга эга бўлиб, БМТнинг таълим, фан ва маданият бўйича асосий ҳужжатлари, Евроосиёда туризм ва саёҳатлар бўйича ҳамкорлик тўғрисидаги (Анталия конвенцияси) ҳамда “Жамиятлар, халқлар ва миллатларнинг барқарор ривожланиши манфаатлари йўлида туристик диққатга сазовор жойларни тарғиб қилиш тўғрисида«ги конвенцияларга асосланади.

Муайян объектни махсус туристик диққатга сазовор жойларнинг Жаҳон рўйхатига киритиш тўғрисидаги қарор Туризмни барқарор ривожлантириш бўйича халқаро қўмита сессияси томонидан овоз бериш йўли билан қабул қилинади.

Бугунги кунга қадар Ўзбекистоннинг 4 та тарихий диққатга сазовор жойлари ушбу рўйхатга киритилган.