АҚШнинг собиқ президенти Доналд Трампга 2021 йил 6 январда Капитолийга бостириб кириш билан боғлиқ жиноий иш бўйича расман айблов эълон қилинди. Бу ҳақда махсус мустақил прокурор Жек Смит эълон қилган ҳужжатдан маълум. Катта Федерал ҳакамлар ҳайъати айбловни ёқлаб овоз берган.

Трамп тўртта моддада айбланмоқда: давлатни алдаш мақсадида фитна уюштириш, расмий жараёнга тўсқинлик қилиш, расмий жараёнга тўсқинлик қилишга уриниш ва ҳуқуқни бузиш учун тил бириктириш. Прокурорларнинг таъкидлашича, Трамп ўзининг Жо Байден устидан ғалаба қозонгани ҳақидаги иддаолар ёлғон эканини билган, бироқ у Америка жамиятида “ишончсизлик ва ғазабнинг зиддиятли муҳитини” яратиш ва “ жамоатчиликнинг сайлов жараёнига ишончини йўқотиш” мақсадида ёлғонини такрорлаган, деб ёзади Reuters.

Ҳужжатда Трамп, прокурорларга кўра, сайловда “мағлубиятга учраганига қарамай, ҳукуматда қолишга қатъий қарор қилгани” очиқ айтилади.

Собиқ президент билан бирга исм-шарифи ошкор этилмаган олти киши, жумладан, “сохталаштириш ҳақидаги асоссиз даъволарни тарқатган” адвокатлар ҳам айбланган. Смитнинг таъкидлашича, айблов хулосасида Трамп бу чиқишларни "ақлдан озиш" деб атаган, лекин уларни авж олдиришда иштирок этган.

3 август куни Трамп Вашингтон полициясига таслим бўлиши ва ҳибсга олишни белгилаш учун судья ҳузурида бўлиши керак.

Республикачи Дональд Трамп 2020 йил ноябрида бўлган президентлик сайловларида демократ Жо Байденга ютқазган эди. Трамп бир неча ой давомида мағлубиятни тан олишдан бош тортган ва фирибгарлик ҳақидаги асоссиз даъволарни тарқатган. 2021 йилнинг 6 январида, натижалар Конгресс томонидан тасдиқланган куни Трамп тарафдорлари тўдаси Капитолийга бостириб кириб, мажлисни бузган.

Бу Трампга нисбатан учинчи жиноий иш. Апрель ойида Манхэттен округидаги Катта ҳакамлар ҳайъати сохта бизнес ҳисоботлар ҳақидаги даъволарни тасдиқлаган ва июнь ойида адвокат Смит Трамп қароргоҳларида махфий ҳужжатларни ноқонуний сақлаш бўйича иш очган.

Трамп бўлажак сайловларда Республикачилар партиясидан президентликка номзод бўлиш учун асосий даъвогардир. Агар у бирон бир айблов бўйича айбдор деб топилиб, қамоққа жўнатилган тақдирда ҳам бу уни АҚШ президентлигига номзод бўлиш ҳуқуқидан маҳрум қилмайди.