Андижон вилоят ҳокимлиги томонидан ишлаб чиқилган Андижон вилоятидаги автомобилларни бензин билан таъминлаш бўйича муаммоларни бартараф этиш юзасидан амалга ошириладиган чора-тадбирлар ижросини таъминлаш мақсадида “Ўзнефтгазинспекция” Андижон вилоят ҳудудий бўлими томонидан вилоятдаги АЁҚШларда сотилаётган автобензин маҳсулотлари сифати устидан назорат ўрнатилган.

Жумладан, жорий йил бошидан “Ўзнефтгазинспекция” Андижон вилоят ҳудудий бўлими томонидан вилоятдаги АЁҚШлардаги 243 минг 619 литр АИ-92 маркали автобензин маҳсулотлари лаборатория текширувларидан ўтказилиб, 10 та АЁҚШлар томонидан 64 минг 317 литр АИ-80 маркали автобензинни АИ-92 маркали автобензин сифатида сотиш ҳолатлари аниқланиб, ушбу ҳолатлар бартараф этилиши таъминланиб, тўпланган ҳужжатлар қонуний чора кўришлик учун ҳуқуқни муҳофаза қилиш органларига топширилди.

Ҳозирги кунда АИ-80 маркали автобензин сотилаётган ҳар бир АЁҚШларга “Андижон нефт базаси” МЧЖнинг маъсул ҳодимлари бириктирилиб, шаҳобчада автобензин сотилган автотранспорт воситалари мониторинги юритилиб, келтирилган автобензинни охиригача сотилиши таъминланмоқда.

“Ўзнефтгазинспекция” Андижон вилоят ҳудудий бўлими томонидан назорат ишлари давом эттирилмоқда.

"Истеъмолчилар томонидан АЁҚШларда сотилаётган АИ-92 маркали автобензин маҳсулотлари сифати бўйича эътирозлари келиб чиққанда “Ўзнефтгазинспекция” Андижон вилоят ҳудудий бўлимига мурожаат қилишлари мумкинлигини билдирамиз." – дейилади Андижон вилояти ҳокимлигининг расмий баёнотида.