Ҳурматли андижонликлар!

Коронавирус пандемиясининг хавфи ҳамон кун тартибидан олиб ташлангани йўқ. Вилоят штаби бунга қарши тизимли иш ташкил этган. Кўрилаётган чораларга қарамай вилоятимизда инфекция юқтириб олиш ҳолатлари кузатилмоқда.

Жумладан, ҳозирда ушбу хасталик билан оғриган 52 нафар фуқаро даволанаётган бўлса, бир кунда яна 80 нафар фуқарода хасталик аломатлари аниқланди. Улар орасида 68 нафари четдан кириб келган ватандошларимизни ташкил қилади. 12 фуқаро эса аҳоли орасидан аниқланди. Касаллик аломатлари қайд этилганларнинг яна қарийб 100 нафар яқинларидан тест олинди. Натижаларига қараб тегишли муолажалар ўтказилади.

132 аъзодан иборат вилоят ишчи гуруҳи тарғибот ва ташвиқот ишларини олиб бормоқда. Аҳоли гавжум жойларида назорат ва мониторинг юритилмоқда. Тиббий ниқобсиз юрган, карантин қоидаларига зид равишда фаолият олиб бораётган ташкилот ва муассасларга нисбатан чоралар кўрилмоқда.

Республика махсус комиссияси йиғилиш баёнига кўра сариқ ҳудудларга киритилган туман ва шаҳарларда жамоат транспорти, таксилар, шу жумладан вилоятлараро йўналишларда ҳаракатланишни чеклаш кўзда тутилган. Шунингдек, вилоятимиздаги бозорлар ва савдо комплекслари шанба ва якшанба кунлари профилактик-тозалов ишларини ўтказиш учун ёпилади.

Ҳурматли фуқаролар!

Аввало ўзингизнинг, яқинларингизнингсаломатлигини сақлаш, давлатимиз томонидан кўрилаётган чораларнинг натижадорлигини таъминлаш учун пандемия даврида жорий этилган карантин қоидаларига қатъий риоя этишларингиз сўралади. Тартиб-таомилларни бузган жисмоний ва юридик шахсларга нафақат маъмурий, балки жиноий жавобгарлик белгиланганлигини яна бир бор эслатиб ўтамиз.

Ўзингизни ва атрофдагиларни асранг!