Коронавирус инфекцияси ҳақида қанча кўп билганимиз сари, шууримизни тобора таҳлика, ташвиш эгаллаши табиий. Нафақат касалликнинг олдини олиш, шунингдек, онгимизни эгаллашга уринаётган ваҳимани енгиш учун нима қилмоқ керак?

Бунинг учун, аввало, карантин қоидаларига, тиббий ва санитария-гигиена амалларига қатъий риоя қилиш керак. Шунингдек, қалб хотиржамлиги ҳам зарур. Буни бежиз таъкидламаяпмиз. Бутун дунё табобати ва тиббиётининг отаси Абу Али ибн Сино ҳазратлари айтганларидек, “Хотиржамлик – ярим соғлиқ, сабр эса шифонинг бошланишидир!”

Юртбошимиз аҳолига неча марта мурожаат қилган бўлса, барчасида қаттиқ интизом, бир мушт сингари бирлашиш билангина пандемияни енгишимиз мумкинлигини айтиб ўтди. Дарҳақиқат, шундай. Бемақсад кўча чиқманг, дейиляптими, демак, бу чақириққа қулоқ осишимиз ўзимиз учун фойдали. Айниқса, ёши 65 дан ўтган кексаларнинг фақат уйда ўтиришлари бежиз таъкидланмади. Чунки бу ёшдагиларнинг иммун тизими анча заифлашади. Бу, организмнинг турли касалликларга қаршилиги сустлашди, деганидир. Қолаверса, сурункали касаллиги бор юртдошларимиз ҳам ўзларини жиддий эҳтиёт қилишлари даркор. Негаки, уларнинг вужуди ҳам мавжуд хасталикка қарши кураш жараёнида анча чарчаганлиги табиий. Шифокор сифатида қарийб эллик йиллик фаолиятим мобайнида бунга кўп бор гувоҳ бўлганман.

Ибн Сино бобомизнинг яна бир ҳикматини эсингизга солмоқчиман. Ҳазрат шундай деган эдилар:

-Биз уч томонмиз: мен, яъни табиб, у, яъни хасталик ва бемор. Бемор қайси томонга мойил бўлса, ўша томон енгади...

Бундан келиб чиқадиган маъно шуки, коронавирус касаллиги келтириб чиқараётган оқибатлардан ташвишланишнинг ўзиёқ “тождор ёв”томонга ўтиш билан баробар. Барчамиз бирлашиб, қарши курашиш билангина уни енгишимиз мумкин.

Бугун пандемиянинг олдини олиш, хасталанганларни даволашга камарбаста бўлаётган шифокорларимиз гўёки жанг майдонида душман билан яккама-якка олишишмоқда. Келинг, уларга иш орттирмай, уйимизда қолайлик ва улар ҳақларига дуолар қилайлик!

Зуҳриддин САЛОҲИДДИНОВ,

тиббиёт фанлари доктори, профессор,

“Меҳнат шуҳрати” ордени нишондори.