Уйда келган илҳомлар: ТАБАССУМ ҚИЛИНГ ВА КУЛИНГ ЖИЛМАЙИНГ!
09.04.2020 5539
Юзга кирмоқчисиз, биламан, дўстим,
Киринг юзга, майли, тилагим шудир!
Сизни шод кўрганда, бўйларим ўсди,
Бугун сўзимда йўқ, ҳеч гина, гидир -
Яшайин, десангиз, андуҳ билмайин,
Табассум қилинг ва кулинг, жилмайинг!
Майлига, кимлардир тош отар тинсиз,
Бошқаси чуқурлар қазир дамодам.
Беайб - Парвардигор, улар ҳам одам,
Дўст бўлсин десангиз рақибнинг, кинсиз
Ҳақига дуолар қилинг тинмайин,
Табассум қилинг ва кулинг, жилмайинг!
Дунёнинг камларин тўлдириб бўлмас,
Мерос қолган-ку у Одам Атодан!
Дейдилар: “Йўқни ҳеч йўндириб бўлмас”,
Ахир, ҳолимасмиз камлик, хатодан -
Яшамоқ бўлсангиз, камлик кўрмайин,
Табассум қилинг ва кулинг, жилмайинг!
Ҳаётда омадсиз бўлсангизагар,
Меҳнат-ла зафарлар қучасиз бир кун.
Майли, сочилмасин бошингиздан зар,
Ўтган умрингиздан яшанг сиз мамнун –
Ҳаммадан бахтлироқ бўласиз тайин,
Табассум қилинг ва кулинг, жилмайинг!
Савоб ишга ҳар кун бел бойланг маҳкам,
Элни кўкартирар кўпнинг дуоси.
Яхшилик-ла ҳар дам имон мустаҳкам,
Нажмиддин Икромнинг шу илтижоси –
Эзгуликдан қалблар тортаркан майин,
Табассум қилинг ва кулинг, жилмайинг!
Мудом йироқ бўлсин хасад сиз-биздан,
Қадимдан дейдилар торга тор дунё.
Кўнгилни кенг қилинг, нур ёғиб юздан
Қучоқ очганга кенг,беғубор дунё -
Кўнгли торларга сиз парво қилмайин,
Табассум қилинг ва кулинг, жилмайинг!
Нажмиддин ИКРОМИЙ.