Наврўз тантаналарида республикамизнинг турли вилоятлардан, шунингдек, ўнга яқин хориж мамлакатларидан меҳмонлар ташриф буюрдилар. Улар орасида давлат хизматчилари, тадбиркорлар, ишбилармонлар, сайёҳлар бўлганлиги эътиборга молик.

Жумладан, Туркиянинг Измир шаҳридан Гўктал Қутлу илк бор диёримизга келган.

-Турмуш ўртоғим Шакон Қорадоғли ва фарзандларим билан дам олиш учун атайлаб Наврўз байрамини танладик, -дейди меҳмон. – Шўх куй ва қўшиқлар, қадимий анъаналарингиздан қардош эл эканимиз кўриниб турибди. Таассуротлар бой кун бўлди. Шу билан бирга Ўзбекистоннинг очиқ сиёсати туфайли ўлкангизда тадбиркорликни ҳам йўлга қўймоқчиман. Бизнинг компания мева-сабзавотлар, озиқ-овқат маҳсулотларини ишлаб чиқариш билан шуғулланади.

Яна бир меҳмонни суҳбатга тортдик. У Ҳиндистондаги Zaydex компанияси вице-президенти Вивек Кейн экан. Енгил саноат, қишлоқ хўжалиги соҳалари, йўл қурилишида нанотехнологияларга ихтисослашган. 135 та мамлакатда компания технологияси қўлланилса, 40 қа яқин давлатларга экспорт йўлга қўйилган.

-Маданияти ва қадриятларини эъзозловчи халқ буюк бўлади, - дейди Вивек Кейин. – Наврўз тантаналарини кўриб, бунга яна бир бор амин бўлдим.Ҳиндистонда Бобурни, ўзбек халқини яхши билишади ва улуғлашади. Ўйлайманки, олдинда ҳамкорлик кенг қулоч ёзади.