Сўнги кунларда ишонувчан, соддадил халқимиз орасида “Озодлик” радиосининг Телеграм мессенжеридаги “Sizdan Telegram” каналига ўз муаммоларини юбориш урфга айланиб бормоқда. Эътиборлиси шундаки, телеграм каналининг “канал ҳақида” бўлимида маълумот юборувчиларга эслатма сифатида “Шахсингиз сир қолиши кафолатланган”, деган ёзувлар келтирилишига қарамасдан, журналистик этикасига зид равишда ушбу канал администраторлари уларга маълумот юборган шахсларни ошкор қилишни бошладилар.

Хусусан Sizdan Telegram каналининг 29 июль кунги мақолалари орасида фарғоналик бир аёл Ўзбекистон Ёшлар иттифоқи вилоят кенгаши томонидан туман ва шаҳарлар бошланғич ташкилотлари етакчилари маҳаллаларда ишсизликни бартараф этиш учун иш ташкил қила олмаётганликларидан норози бўлиб ёзган маълумот пайдо бўлди. Албатта, маълумот муаллифи Рисолатхон Мамажонова шахси ошкор этилишини ўйлаб ҳам кўрмаган.

Шу ўринда халқимизнинг бир нақли ёдга тушади: “Бизга қора мушук бўладими, ола мушук бўладими – барибир, сичқон тутса – бас!” Демак, нима гапингиз бўлса, айтаверинг, “шахсингизни сир сақлаймиз” деймизу, у ёғини ўзимизга қўйиб беринг, экан-да!

Мақсад ортиқча шов-шув кўтариш, пашшадан фил ясаш эканлиги аён. Эшак миниб, туёғини кўргунча, туя миниб узоғини кўр, деган гап ҳам бор. “Озодлик”чилар Sizdan Telegram каналида бир кимсанинг қўшнисидан қарзини ундира олмаётганлигини, яна бировнинг хотини билан уришиб қолганлигини, яна кимнингдир уйида телевизори ишламаётганлиги ёки дазмоли йўқлигини, андак шишириброқ айтсак, сигири қисирлиги каби “оламшумул” воқеа-ходисаларни бутун дунёга дўмбира қиляптилар. Бизни соддагина одамларимиз эса ўз ички дарду-дунёсини, майда ташвишларини шу каналга йўлласалар, ҳудди осонгина ҳал бўлиб қоладигандай чув тушяптилар. “Отимни айтмас экан”, деб уларга қараб “бўзлаган” Рисолатхон Мамажоновага ўхшаган кимсалар кам дейсизми?

Шу ўринда, бундан бир неча ой аввал ака-ука Бобожоновларнинг Ўзбекистондаги турли ташкилотларга ДХХ номидан қўнғироқ қилиб маълумот олишга ҳаракат қилганликлари Интернет тармоғи орқали ошкор этилган эди. Энди эса телеграм каналидаги бу “ўйинлар” пайдо бўлди.

Сўзимиз якунида ижтимоий муаммоларингиз ечимини “Озодлик” радиосидан эмас, балки ўзимизнинг маҳаллаий Интернет сайтларида ёритиш орқали қидиришингизни сўраб қолардик.

Озод БЕК.