Юртимизда коронавирус пандемиясига қарши курашда жонкуяр, фаол ёшлар ҳам четда тургани йўқ. Тошкент давлат аграр университети Андижон филиалининг агробиология факультети битирувчиси Ҳабибулло Солиев 1 апрелга қадар Андижон шаҳри ва туманидаги аҳоли вакилларига 2 минг дона гигиена воситалари ҳамда тарғибот материалларини тарқатди. Ижтимоий кўмакка муҳтож 5 та хонадонга моддий ёрдам кўрсатди. Дори-дармонга муҳтож элликка яқин хасталарнинг дуосини олди. Ижара уй тўловларига қийналаётган Андижон тумани Нўхатак маҳалласидан Ҳадича Отахоновага кўмак қўлини чўзди.

- Шаҳарнинг Наврўз маҳалласидаги Фаровон ва Саноат кўчаларини кунда дезинфекция қилиб чиқяпман, - дейди Ҳабибулло. – Йўл-йўлакай шу ҳудудда яшовчи Азимжон Бадалбоевга ногиронлик аравачасини ҳадя этганимда унинг хурсандчилигидан ўзимнинг ҳам кўзларимга ёш келди.Иккинчи жаҳон уруши қатнашчиси Самсакбой Махсудовбир-икки уй нарида истиқомат қилади. Нуроний отахоннинг “Халқимиз оғир кунларни ҳамжиҳатликда, бир-бирига елкадош бўлиб енгган. Бу офат устидан ҳам мана шундай оқиллик билан ғалаба қозонамиз”,деган гаплари менга янада куч-қувват бағишлади.

Республика махсус комиссияси қарорига кўра 1 апрелдан жорий қилинган янги карантин чоралари доирасида якка тартибдаги хайрия акциялари тўхтатилди. Эҳтиёжманд кишиларга хайрия ёрдамлари марказлашган тарзда ташкил этилмоқда. Шу боис, Ҳабибулло2 қоп сабзи, 3 қоп макарон ва 500 дона гигиена воситаларини Ҳомийлик хайрияларини мувофиқлаштириш вилоят марказига тақдим этди.

Гулжаҳон ЖАББОРОВА.