ЖАМИЯТ

“Оқ халатли ҳалоскорлар” танловига: БУТУН ЎЗБЕКИСТОН СИЗДАН МИННАТДОР!


01.05.2020   825

Эссе

Хом сут эмган бандамиз-да! Албатта, бошимизга иш тушгандагина кимнинг ким эканлиги, нима яхшию нима ёмонлиги ҳақида ўйлаб қоламиз. Коронавирус балоси бутун дунёни безовта қилиб турган шу онларда ҳаммамиз дуогўй бўлиб қолганимиз ҳам, балки шундандир...

***

Баъзи бир ишларимизни кўз олдимизга келтира туриб, баъзан ўша “Тождор” душманимизнинг “пешонасидан” ўпиб қўйгим келади-да! Нега, дейсизми? У бизга унутилган ёки унутилаёзган кўп нарсаларни ёдимизга солиб қўйди.

Масалан...

Сизу мен ҳар куни қўлимизни уч-тўрт маҳал совунлаб ювармидик? Дарров “мен шундай қилардим”, деманг-да...

Ёки, кўксимизга ўнг қўлимизни қўйиб, ўзбекона саломлашишни ҳам у яна одатга киритганидан ҳам тонамизми?

Авваллари ака-ука бир ёқда тура турсину, ота-онамизнитайёр жамоат транспорти ёки ўз машинамизда бориб, кўриб келишга эринардик. Энди, мана, шу савобли юмушни пиёда амалга оширяпмиз. Бунинг учун ҳам коронавирусдан миннатдор бўлишимиз керак.

Яна, асосийси, бизга энг яқин дўст ким эканлиги ҳам шу кунларда аён бўлди-қолди! Тополмадингиз-а?

Шифокорлар... Барча тиббиёт ходимлари...

Ҳеч бўлмаса, шунга эътироз қилмассиз?

***

Кўзга кўринмас ўша “тождор” ёв билан илк бор юзма-юз келган ким? Албатта, шифокорлар... Пандемиянинг дастлабки кунларида – инфекция ҳеч қандай клиник белгиларсиз намоён бўлаётган вақтда, биринчилардан бўлиб, беморлар билан айнан улар мулоқотда бўлишди. Шунинг учун Хитойда мингдан ортиқ шифокор касалликни юқтириб олди. Бундай ҳолатлар Америка Қўшма Штатлари, Италия, Испания ва бир қатор ривожланган давлатларда ҳам қайд этилди. Лекин бирорта давлатда бунинг учун тиббиёт ходимларини айблаш ҳеч кимнинг хаёлига келмади! Бутун дунё аҳли улар шаънига фақат таҳсинлар айтмоқда!

Шифокорларнинг вирусни ўзига юқтириб олиш ҳолати бизда ҳам учради. Исломда ҳар бир мусибат ёки хасталикни Оллоҳдан, деб билиш уқтирилади. Лекин, аҳолисининг асосий қисми мусулмонлардан иборат бўлган Ўзбекистонимизнинг айрим фуқаролари уларнинг ўзларини айбдор қилишга уринишяпти. Ахир, у – Шифокор Гиппократ қасамёдига содиқ қолиш, уни бажариш учун ўз ҳаётини хавф остига қўйгани, беморни касаллик билан ёлғиз қолдиришни ўзига эп кўрмагани, уни даволашга урингани учун ўзи ҳам хасталанди-ку!

***

Аслида қай биримиз - хоҳ журналист, хоҳ депутат, хоҳ бошқа касб эгаси бўлсин, қайси тиббий муассасага кириб, касалликка чалинганлар ёки шифокорлар билан суҳбатлашди? Шифохонани қўя туринг: ҳатто карантин ҳудудига кириб, у ердагилар ҳолидан хабар олишни ўзимизга эп кўрмадик-ку...

Бутун дунё, ҳатто энг ривожланган давлатлар ожиз бўлиб қолаётган коронавирус барчани шошириб қўйгани ҳаққаст рост! Ўзбек шифокорлари, тиббиёт ходимлари унга қарши юзма-юз курашаётган, ҳар бир беморни унинг чангалидан олиб қолишга уринаётган бир пайтда, кечирасизу, Сизу бизга сичқоннинг ини минг танга бўлди-ку...

***

Сизу биз иссиққина уйимизда, оиламиз бағрида ётган чоғимизда шифокорлару ҳамширалар, кичик тиббий ходимлар, яъни фаррош-санитарлар ўз иш жойини тарк этишмади. Буни душман ёпирилиб келаётган пайтда ўз постини ёки жанггоҳни ташлаб кетмаган аскарга ўхшатсак, Асакамиз кетмайди, ахир?! Оғир аҳволдаги беморни ҳар кун, ҳар соатда текшираётган шифокор, унга муолажа қилаётган нозиккина қад-қоматли ҳамшира қизни кўз олдингизга келтиринг! Нима, уларнинг уй-жойи, оиласи, бола-чақаси йўқми? Ёки, жонлари бизникичалик ширин эмасмикин-а? Нега улар ўзини ўтга уряпти? Ким учун? Ўша шифокору ҳамшира қизлар неча кундан бери уйига боришмагани, яқинларини кўришмаганини биласизми?

Таъбир жоиз бўлса, уларнинг бугунги жасорати Иккинчи жаҳон урушида кўрсатилган қаҳрамонликдан сира кам эмас! Тасаввур қилинг: душманнинг ДОТ, ДЗОТидан тинмай “ўқ ёғиляпти”... Ёвнинг ўзи кўринмайди... Қайсидир ботир жангчи ўзини амбразурага ташлаб, бутун гавдаси билан унинг оғзини ёпади... Ва, қолган аскарлар ёғийни тор-мор этади...

Беморни даволаш, парвариш қилиш пайтида ўзига вирус юқтириб олган шифокор ёки ҳамшираларниАлександр Матросов ва Тўйчи Эрйигитовларга ўхшатгим келади! Улар ўзларини ўйламагани учунгина касалликка чалиндилар.Ахир, ғалабага қон ва жон эвазига эришилади-ку...

Айтинг-чи, коронавирусга чалинган бемор ўз ҳолига ташлаб қўйилганда, нима бўларди? Тўғри, қайсидир шифокор ёки ҳамшира соғ қоларди. Бироқ... Менимча, фикрни давом эттириш шарт эмас.

***

Коронавирус инфекцияси нима эканини ҳали ривожланган давлатларнинг олиму фозиллари, шифокорлари ҳам тушуниб етганларича йўқ. Шунинг учун ҳам у ўзининг билинтирмай ҳужумга ўтиш қобилиятини тўла ишга соляпти.Балки, шу боис ҳам деярли бутун дунёни забт этиб улгурди. Ҳозиргача шу вирус билан билан касалланганлар сони уч миллиондан ошиб, тўрт миллионга кетяпти. Ҳатто, манаман, деган АҚШ, Италия, Франция, Испания каби давлатларда кунига минглаб одамлар қурбон бўляпти. Нега улар коронавирус беморлари кўпайиб кетганлиги учун шифокорларни айблашмаяпти? Чунки, бугун биз номаълум ва кўринмас маккор “душман” қаршисида турибмиз.

Демак, вируснинг қилаётган ишлари учун шифокорларни айблаш тўғри эмас!

Хайрият, жонажон Ўзбекистонимизда олдиндан амалга оширилган саъй-ҳаракатлар ўз самарасини берди. Касалланганлар бошқаларга нисбатан озчиликни ташкил этади. Қурбонлар ҳам кам. Кўз тегмасин! Хурсандлик билан айтиш керакки, кейинги кунларда хасталикдан тузалаётганлар кўпайди.

Келинг, кимларнинг меҳнати, ҳаракатлари эвазига шундай натижага эришилганини бир ўйлаб кўрайлик. Ишонинг, бу, куну тун беморнинг ёнидан жилмаган, жонини гаровга қўйиб, таъбир жоиз бўлса, ўзини ўйламаган, “жанг майдонини” тарк этмаган шифокорлар меҳнати самарасидир! Уларни ҳар қанча мадҳ этсак, ҳар қанча олқишласак, арзимайдими?

Арзийди, дўстим, арзийди!

***

Энди, майли, кимга ёқмаса, қулоғини беркитиб турсин. Менинг тиббиёт аҳлига айтадиган гапларим бор...

-Азиз шифокор ука! Муҳтарама ҳамшира синглим! Фаррош опажон!

Ким нима деса, деяверсин, Сизнинг меҳнатингиз ҳар қандай тасанною эҳтиромга лойиқ! Илоҳим, Оллоҳ умрингизни зиёда қилсин.

Сиз касаллик ва бемор ўртасида туриб, кимнингдир отаси, онаси ёки ака-укаси, синглиси, фарзанди аржумандини ҳаётга қайтаришга уринган пайтингизда ёнингизда туролмаганимиздан хижолатмиз. Бутун Ўзбекистон халқи, барчамиз Сиздан миннатдормиз, азизларим! Бу ҳақда Юртбошимиз ҳар чиқишларида таъкидлаганларида, мижжаларимизга қалққан ёш оёқларингиз остидаги чангларни аритишга арзиса, қанийди! Ҳар бир бемор устида тўккан пешона терингиз кўзларимизга тўтиё қилсак оз!

Сизнинг фидокорона меҳнатингиз, куну тунлар чеккан заҳматингиз “Тождор” душманни чекинтирди, азизим! У енгилди ва чекина бошлади. Уни Сиз енгдингиз! Ғалаба онлари яқин, иншооллоҳ, ўша кунларга биргаликда етайлик, қадрдонларим!

Биз эса бошимиз ерга теккунча таъзимдамиз!

Бутун Ўзбекистон Сиздан миннатдор!

Сиз бунга арзийсиз!

Нажмиддин ИКРОМИЙ.