Бугуннинг гапи

Оила қурмоқчи бўлганлар ўқув курсларига мажбурий ўқитилади


10.02.2018   257

Эндиликда Ўзбекистонда оила қурмоқчи бўлганлар ўқитилади.Ажрашишлар фақатгина суд орқали бўлади ва ярашиш учун бериладиган муддат узайтирилиши кутилмоқда

Аёлларни қўллаб-қувватлаш ва оила институтини мустаҳкамлаш комплекс чора-тадбирлари дастурида никоҳни қайд қилиш ва бекор қилиш қоидаларини киритиш кўзда тутилган, деб хабар қилмоқда Спутник Ўзбекистон.
Никоҳдан ўтмоқчи бўлган шахслар махсус таълим дастури бўйича оилавий ҳаёт мажбурий ўқув курсларида ўқишлари керак бўлади. Ушбу дастур чет эл тажрибасини ҳисобга олган ҳолда ишлаб чиқилиши айтилмоқда.

Шунингдек, никоҳдан ўтмоқчи бўлганларнинг соғлиғи тўғрисида атайдан нотўғри маълумотлар берадиган раҳбарлар ва тиббиёт муассасалари ходимлари учун жавобгарликни кучайтириш режалаштириляпти.
Никоҳни қайд этиш муддати узайтирилади. Жиддий қарор борасида мулоҳаза учун бир ойлик муддат етарли эмас, деб топилган. Никоҳни бекор қилиш фақатгина суд орқали ўтказилиши кўзда тутиляпти. Шунингдек, эр-хотинга бериладиган ярашиш муддати бир йилга узайтирилади.

Ажрашиш ташаббуси билан чиққан томон иккинчи томонга товон пули тўлаши сингари жаҳонда кенг қўлланилиб келаётган амалиёт Ўзбекистонда ҳам ҳаётга татбиқ этилиши режалаштирилмоқда.