Ижтимоий тармоқларда жамоатчиликни ўзига тортиш мақсадида тарқатилаётган турли хил видеолар кескин қораловларга сабаб бўлмоқда. Улардан бири “Tashkent city”да Маҳлиё исмли қизни карантин талабларини бажармасдан “маза” қилиб юришни тарғиб қилган видеосидир. Ушбу сўзлар муаллифи Тошкент вилояти Қибрай туманида яшовчи Маҳлиёбону Бозорбоева эканлиги маълум бўлди, дея хабар бермоқда Тошкентдаги манбамиз.

Қизнинг айтишича, видео карантин чоралари амалга киритилмаган даврда суратга олинган. Апрель ойига келиб шахсий профилига жойлаштирган. Бу эса кўплаб фойдаланувчиларнинг эътирозига сабаб бўлган. Қилган ишидан пушаймонлигини билдириб, узр сўради.

Маҳлиёбонуга барча асослар ҳамда оқибатлар ҳақида тушунчалар берилиб, санитария-эпедемиология давлат назорати инспекцияси томониданбаённома расмийлаштирилди. Унга кўра, Ўзбекистон Республикаси Маъмурий жавобгарлик тўғрисидаги кодексининг 54 моддасига биноан базавий ҳисоблашнинг 5 баробари миқдорида жарима тайинланди. Маза қилиб юрибмиз, дея қувонган қизнинг узоқни ўйламай қилган ҳаракати жарима ва ортиқча оворагарчиликларга сабаб бўлди.

Фарзанд ортидан келадиган хурсандчилик ҳам, хафагарчилик ҳам ота-онанинг қалбида из қолдиради. Маҳлиёбонунинг бу хатти-ҳаракати онасини ташвишлантирмасдан қўймади, албатта.Ҳеч бир фарзанд ота-онасини бундай ҳолга солиб қўймасин. Бунинг учун эса оила бошлиқларининг ўзлари ҳам доимо уларни назоратда тутишлари лозим. Акс ҳолда мана шундай нохуш ҳолатлар яна кимнингдир юзини ерга қаратиши мумкин.

Ҳар қандай олийжаноблик, эзгуликнинг ажри, нотўғри босилган қадамнинг жазоси бор. Буни унутмаслик, доимо ёдда тутиш, ўсиб келаётган ёш авлодга қайта-қайта такрорлаб туриш керак. Бундан ташқари катталар ўзларининг юриш-туриши, ҳатти-ҳаракатлари билан уларга ўрнак бўлиши лозим. Шундагина кутган ҳосилимизни оламиз, роҳатини кўрамиз.

Муроджон ТЎХТАНАЗАРОВ.

PS: Юқоридаги ҳолатлар бўйича 13 апрель соат 23.15 да «ZO`R»TV телеканалининг 25 соат кўрсатувида батафсил кўринг!