Ер юзида одам танламасдан қўрқинчли рақамларда намоён бўлаётган тождор душман номли касаллик-коронавирусга оид статистик маълумотлар барчамизни ҳушёрликка чақирмоқда. Айни вақтда бу кўрсаткичлардан ҳар биримиз хулоса қилишимиз зарур. Пандемия инсоният бошига жуда катта кулфатларни солмоқдаки, ўзимиз ва яқинларимиз саломатлиги, юртимиз тинчлиги йўлида давлатимиз раҳбари бошчилигида оқилона сиёсат олиб борилаётганига шукр қилишимиз лозим.

Андижон вилоятида ҳам бу борада зарурий чора-тадбирлар қўлланилмоқда. Бироқ бундан тўғри хулоса қилиш ўрнига карантин қоидаларига амал қилмаслик холатлари кузатиляпти. Билингки, бу биринчи навбатда ўзингиз ва оилангиз учун ҳавфлидир.

Карантин талабларидан келиб чиқиб, кўчаларда мақсадсиз ҳаракатланиш, транспорт воситалари қатнови ва ниқобсиз юриш хақида такрор такрорайтилмоқда. Шунга қарамай бу масалага айрим юртдошларимиз эътиборсизлик билан қарамоқда.

Аҳоли саломатлигини сақлашда санитария-эпидемиология осойишталиги марказлари ходимларининг масъулияти янада ортди. Унутманг, уларга қулоқ тутиш билан касалликка қарши курашишга ўз ҳиссангизни қўшасиз.

Бугун аҳоли орасида касаликка чалиниш холатлари кузатилаётгани янада ташвишланарли. Бу ўз ўзидан жамоатчилик билан ишлаш, ҳар бир хонадонга кириб бориш зарурлигини кўрсатади. Бу маҳалла фаоллари, жамоатчилик билан ишловчи идораларнинг ходимларини энг долзарб вазифасига айланди. Жумладан, халқнинг ишончли вакиллари бўлган депутатлар ташаббусни ўз қўлига олиши лозим.

Ўзимизни қанча эҳтиёт қилсак, оила аъзоларимиз ва яқинларимиз саломатлигини асраган бўламиз. Қадимдан халқимиз “Касалликни даволагандан кўра олдини олган маъқул” деб бекорга айтмаган. Касалликдан ким сақланади? Жавоб битта: белгиланган тартибга амал қилганлар.

Келинг, уйда карантин қоидаларига риоя этган ҳолда, ўз саломатлигимизни сақлаб қолайлик. Зарурат бўлмаганда кўчага чиқмайлик.

Акбаржон НАЗАРОВ,

Рустамжон ЭШОНОВ.