Унинг юрагидаги меҳр аллақачон уммонларга айланган. Қадамида шижоат. Билагида куч. Ҳар кунидан янги ташаббуслар туғилади. Мақсади олий: халққа камарбасталик! У Ҳақ ва халқидан куч олади ва шу кучни саҳоватга айлантириб яна халқига қайтаради...

Қаҳрамонимиз оддийликни яхши кўрадиган тадбиркор. Фаолияти эзгуликка уйғун, инновацияларга ҳамоҳанг. У эл тили билан айтганда, қурувчи-тадбиркор. Энг муҳими омадига ишонади. Кеча у ишбилармонлик муҳитига эндигина кириб келаётган ишқибоз бўлган бўлса, бугун нафақат андижонликларга таниш, балки жаҳоннинг қатор давлатларида бизнес ҳамкорларига эга салоҳиятли тадбиркор – “Nice Group” қурилиш компанияси директори. Яна бир муҳим мақом соҳиби – халқ депутатлари Андижон шаҳар Кенгаши депутати. Азизбек Омоновнинг депутатлик фаолияти тадбиркорлик фаолияти билан уйғунлашган, икки соҳа бир-бирини тўлдиради.

Халқимиз оғир синовли паллада. Давр бугун саҳоватпешалардан ҳар доимгидан ҳимматли, ҳар қачонгидан танти бўлишни талаб қилаётгани бор гап. Аслида бу фазилат ўргатилмайди. Қонга сингган, сут билан жонга бахш бўлган олиҳимматлилик, айниқса, синовли машаққатли вақтда билинади. Гуруч курмагидан тош сарагидан ажратилаётган фурсатлар тадбиркорларимизга бу борада имконият бўлгандек...

Азизбек Омонов ўзи истамади: қайсики хайрия акциясини авж нуқтага олиб чиққанини эълон қилишни... Мана, юрагида имони билан “бир қўлинг берганни иккинчиси билмасин” деган амали исботи! Бироқ биз ўзига айтишни лозим топмай ёритдик. Сабаби, синовли даврда халқ ўз эхсонпарварини дуо қилсин...

Карантин кунларидаги машаққатдан айрим тадбиркорлар томонидан бозорлардаги, маркетлардаги озиқ-овқат маҳсулотлари нархининг сунъий оширилганлиги сир эмас, албатта. Хайрия тадбирлари эса мана шу оғриққа малҳам. А. Омонов томонидан Андижон шаҳридаги 210 та эҳтиёжманд оилага қилинган хайру саҳоват вилоятдаги ана шундай тадбирларнинг давомийлигини таъминлади.

“Шундай оилаларнинг яхши кунида ҳам, ташвишли кунида елкадош бўлишимиз керак!” Бу Азизбек Омоновнинг фикри. Демак, бундай хайриялар шу билан тўхтаб қолмайди, компания томонидан доимий амалга оширилади.

Ғолибжон АБДУЛЛАЕВ.