Бу воқеа содир бўлганидан буён анча вақт ўтди. Бироқ унинг аччиқ хулосаси хали кўпчиликнинг ёдидан кўтарилгани йўқ. Ашурали уни билган таниганларнинг айтишича, хийла аёлларга ўч эди. Мактабни тамомлаб, ўқишга киролмай ёлланма ишчи бўлиб юрган Рухсорага “ишқи” тушди. Ашурали уни пойлайдиган бўлди. Қизтурмушга чиқиб кетди. Бироқ кўп ўтмай бошини эгиб, ота уйга қайтиб келди. Ашурали мана энди уни “илинтирди”. Ҳатто шаҳарга олиб кетиб, бир уйни ижарага олиб, ноқонуний равишда яшай бошлади. Хотинини алдаб, кун-кунора Рухсоранинг висолига ошиқар эди. Гап-сўз кўпайди. Эл оғзига элак тутиб бўладими? Биров Ашурали ўзи чатоқ, деди, яна биров Рухсора суюқ, ғунажин кўзини сузмаса, буқа ипини узмайди, деди.

Ҳарбий хизматдан қайтган Собир синглиси ҳақидаги гапларни эшитдию Ашуралининг изидан тушди. Кунлардан бир кун тунда уни кўчада тутди. Аввалдан тайёрлаб қўйган хўжалик пичоғини Ашуралининг дуч келган жойига санчди. Шундаям тирик эканлигини кўриб, шартта бўйнини узиб ташлади. Буни қарангки, Ашурали ўша тунда яна бир нахс босган ўйнашининг уйидан қайтаётган экан.

Суд Собирни 12 йил қамоқ жазосига ҳукм қилди. Бузуқлик, ҳиёнат, фахш ииллатлари ботқоққа ўхшайди. Ким яқин борса, оёғидан тойиб, лойқага булғанаверади. Биз ўтган иш ўтди-кетди, деймиз. Аслида қинғирликни, у содир бўлганидан кейин муҳокама қилмасдан олдини олиш чорасини кўрмоғимиз керак.

Жиноят ишлари бўйича Булоқбоши тумани судида ўтган салкам уч йил мобайнида 360 нафар шахсга нисбатан 275 та жиноят иши кўрилди. 265 нафар шахсга нисбатан ҳукм чиқарилди. Кейинги пайтда ишларнинг 67 фоизи сайёр суд мажлисларида кўрилганлигини инобатга олсак, фуқароларда жиноятнинг олдини олиш масаласида ниҳоятда изчил иш юритиш тақозо этилаётганлигига гувоҳ бўламиз. Масалан, аҳоли билан 135 та очиқ мулоқотлар ташкил этилганида кўп муаммоларга ойдинлик киритилди. Суд ҳокимиятининг мустақиллиги тўғрисидаги нормалар ҳаётга татбиқ этилаётган паллада жиноятга қарши курашиш билангина чекланиб қолмасдан, энг аввало унинг олдини олиш, профилактикасига жиддий ёндашув талаб этилмоқда.

Инъомжон НОРМАТОВ,

Жиноят ишлари бўйича Булоқбоши

тумани судининг раиси.