ЖАМИЯТ

ЭНЕРГИЯ РЕСУРСЛАРИДАН ОҚИЛОНА ВА САМАРАЛИ ФОЙДАЛАНИНГ!


25.08.2020   2427

Иқтисодиётимизни янги босқичга кўтаришда энергетика соҳасининг ҳам алоҳида хиссаси борлигини таъкидлаш лозим. Бугунги кунда хоҳ юридик, хоҳ жисмоний шахс бўлсин электр энергияси таъминотисиз ўз фаолиятларини йўлга қўйиш қийин. Ислоҳотлар жараёнида айниқса, электр энергиясига бўлган талаб ва эҳтиёжлар кундан кун ортиб бораётганидан буни англаш мумкин.

Соҳада кейинги йилларда модернизация жараёнлари босқичма-босқич амалга оширилиб, янги-янги электр энергияси ишлаб чиқариш иншоотлари қурилаётганлиги келгусида мамлакатда электр энергияси тақчиллигига тўла-тўкис барҳам бериш имкониятини яратиши кутиляпти.

Энергетика соҳасида бундай ислоҳотларни амалга оширилиши билан биргаликда ундан оқилона фойдаланишга қаратилган чора-тадбирлар ҳам босқичма-босқич йўлга қўйилмоқда.

Жумладан, 1997 йил 25 апрельда кучга киритилган “Энергиядан оқилона фойдаланиш тўғрисида”ги Ўзбекистон Республикасининг қонунига жорий йилнинг 14 июль кунида ўзгартиришлар киритилиб, қўшимчалар билан тўлдирилган.

Қонуннинг 112-моддасига энергиядан оқилона фойдаланиш соҳасидаги давлат текшируви ва назорати органлари энергетика ресурсларидан самарасиз фойдаланганлиги учун юридик шахсларга нисбатан иқтисодий жазо чоралари қўлланиши тўғрисида қўшимча киритилган.

Шунга кўра янги ишга туширилаётган объектларда электр энергиясидан оқилона ва самарали фойдаланиш учун шунга қаратилган чора-тадбирларни, яъни илгари фойдаланилган генератор ускуналари, кучланишни пасайтирувчи трансформаторлар, электр двигателлар, шунингдек, энергия самарадорлиги, D тоифадаги энергия сарфловчи ускуналарни ўрнатмаслик, эндиликда А, В, С тоифалардаги энергия сарфловчи ускуналар ўрнатилиши кўзда тутилиши керак.

Янгидан ишга туширилаётган ва реконструкция қилинган электр қурилмаларни электр тармоғига уланишида муаммолар ва масъул ходимларнинг ноқонуний хатти харакати аниқланган тақдирда “Ўзэнергоинспекция” Андижон ҳудудий бўлимининг “Ишонч телефони” (74) 223-49-72 га қўнғироқ қилишингиз мумкин.

Фарҳодбек САТИМБОЕВ,

“Ўзэнергоинспекция”

Андижон ҳудудий бўлими

етакчи мутахассиси.