Андижон 24

Энди ипак қуртидан беш мартагача ҳосил олиш мумкин


03.05.2018   21801

Маълумки, шу пайтгача республикамизда ипак қуртидан йилиги атига бир марта — баҳор фаслида ҳосил олинар эди. Энди бу жараён йил мобайнида давом этади. Бунга ҳудудларда барпо этилаётган Хитой усулидаги янги интенсив тутзорлар имкон яратади. Ана шу мақсадда Асака туманида ташкил этилган “Янги ипак йўли” ўзбек-хитой қўшма корхонасида 30 гектар майдонда тут плантация барпо этилди.

— Интенсив тут кўчатларининг афзаллик жиҳатлари шундаки, уларни сув таъминоти қийин бўлган ҳудудларда ҳам парваришлаш мумкин, — дейди корхона раҳбари Маҳмуджон Умрзоқов. — Улар тез етилувчанлиги, озуқавий қувватининг юқорилиги билан аҳамиятлидир. Кўчатлар баравж ривожлангач ипак қуртидан бир йилда 4-5 мартагача ҳосил олиш мумкин бўлади.

Айни пайтда корхонада 100 нафар ишчи меҳнат қилаяпти. Улар Хитой давлатидан келтирилган 400 минг туп тут кўчатини экиб бўлишди. Бунинг учун чет эллик сармоядорлар томонидан 2 млн. 300 минг АҚШ доллари миқдоридаги маблағ йўналтирилди. Келгусида корхонада тут барги етиштириш, пилла қуртини парваришлаш ва ундан олинган ипакни қайта ишлаш йўлга қўйилади.
Саминжон ҲУСАНОВ,
“Халқ сўзи” мухбири.

xs.uz сайтидан олинди.