Карантин даврида ижтимоий ҳимояга муҳтож оилаларга ёрдам кўрсатиш, уларга зарур маҳсулотларни етказиб бериш ишлари жадал олиб борилмоқда.

Шу мақсадда Республика махсус комиссиясининг қарори билан Маҳалла ва оилани қўллаб-қувватлаш вазирлиги Ҳомийлик хайрияларини мувофиқлаштириш маркази ташкил қилинди.

Ҳомийлик хайрияларини мувофиқлаштириш маркази Ўзбекистон Республикасида COVID-19 пандемиясидан жабр кўрган аҳолига, биринчи навбатта, эҳтиёжманд оилаларга бирламчи озиқ-овқат махсулотлари ва дори-дармонларни етказишга кўмаклашиш мақсадида жорий этилди.

Вилоятимизда ушбу марказ фаолияти 4 апрелдан йўлга қўйилди. Андижон шаҳрида жойлашган марказда кўнгилли асосда ишлаш учун Ёшлар иттифоқи вилоят кенгаши аъзоларидан июорат волонтерлар жалб этилди. 8 нафар оператор 9.00 дан 17.00 га қадар “1197” қисқа рақами орқали келиб тушаётган мурожаатларни қайд этишмоқда. Шунингдек, бирламчи озиқ-овқат махсулотлари ва дори-дармонларни тушириш, юклаш ишларини бажармоқдалар.

-Вилоят бўйича ушбу ишга жами бўлиб 262 нафар волонтер жалб этилган, - дейди Ёшлар иттифоқи вилоят Кенгаши раиси Ойбек Йўлдошев. – Шу жумладан, Андижон шаҳрида 30 нафар аъзоларимиз ўз ҳиссаларини қўшмоқда.

Мурожаатлар асосида тузилган рўйхат бўйича 2 килограммдан гуруч, шакар, ун, пиёз, сабзи, макарон, 5 килограммдан картошка, 2 литрдан ўсимлик ёғи, тиббий ниқоблар, антисепик ҳамда дори-дармон воситалари тарқатилмоқда.

Маҳсулотлар вилоят транспорт бошқармаси томонидан ажратилган “Дамас” автомашиналарида манзилга етказиляпти.

-Нафақат ёрдам сўраб мурожаат қилинмоқда, балки ҳайрли ишга ҳисса қўшиш, айниқса ўз транспорт воситасида бепул етказиб бериш ниятидагилардан ҳам қўнғироқлар тушмоқда, - дейди волонтер Мансурбек Матисаев. – Дастлабки кунларда айрим техник сабабларга кўра телефон алоқасида узилишлар кузатилди. Ҳозир барча операторларимиз “1197” қисқа рақами орқали мурожаатларни қабул қилмоқдалар.

7 апрель ҳолатига 1833 та мурожаат келиб тушган бўлиб, 336 нафарига ёрдам кўрсатилди. Энг кўп мурожаат Андижон шаҳридан (592 та), энг ози – Хонободдан (8 та) қайд этилди.

Маблағ ўтказмоқчи бўлганлар учун “Маҳалла” хайрия фондининг Миллий банк Андижон вилояти бўлимида ҳисоб рақами очилди. Унинг реквизитларини келтирамиз: 20212000900568395007. МФО: 00074. СТИР: 200231221.

С.Шукуров.

А.Қодиров.