Бугун аҳолининг санитария-эпидемиологик осойишталигини таъминлаш ва коронавирус касаллиги тарқалишининг олдини олиш барчанинг биринчи галдаги вазифасига айланди. Юртимизда вазият тўлиқ назорат остига олинганлигини телевидение, интернетдаги ахборот тармоқлари орқали кўриб-билиб турибмиз. Бу менга тегишли эмас, бизда касалликка чалинганлар йўқ, дея бефарқ бўлиш виждонли одамнинг иши эмас.

Республика махсус комиссияси томонидан Ўзбекистонга коронавируснинг янги тури кириб келиши ва тарқалишининг олдини олиш юзасидан изчил ва тизимли ишлар олиб борилаётгани бежиз эмас.

Жорий йилнинг 23 апрель ҳолатига вилоятда жами 148 нафар фуқаро вирусга чалинган. Уларнинг 51 нафари буткул соғайди. Ҳозирда 97 нафар бемор даволанишни давом эттирмоқда.

Кўзга кўринмас бу дард билан курашиш учун давлатимиз ҳар бир бемор учун 32 миллион сўм, оғир аҳволдаги ҳар бир беморга 64 миллион сўм сарфлаётганини ва одамлардан ўз уйида ўтиришдан бошқа нарса талаб қилмаётганлигини ҳар биримиз чуқур ҳис қилишимиз даркор.

Юртимиздаги эпидемиологик вазият ҳали барқарорлашмаганлиги, қолаверса, дунё бўйича коронавирус инфекциясининг тарқалиши ортаётгани туфайли Республика махсус комиссияси коронавирус инфекцияси кенг тарқалишининг олдини олиш мақсадида ҳозирга қадар жорий этилган чекловлар 2020 йилнинг 10 майига қадар узайтирди.

Инфекцияга чалинганлар қаттиқ карантин режимида даволанаётганлиги боис, оиласи ёнида бўлолмаётгани, ҳатто яқин инсонларининг ўлимига сабабчи бўлиб, дафн маросимларида ҳам иштирок этолмаганлигини кўриб-билиб турибмиз.Айниқса, ёшларда касаллик белгилари билинмасдан ўтиб кетишини мутахассислар такрор-такрор таъкидлаб, уларнинг вирус ташувчи бўлиб қолмасликка чорлашмоқда. Белгиланган қатъий қоидаларга, тартиб-тамойилларга барча бирдек риоя қилиши зарур.

Бироқ, атрофда карантин қоидаларини билиб туриб бузиш ҳолатлари содир этилаётгани ачинарли. Кечаю кундуз аҳоли саломатлиги, осойишталиги йўлида тиним билмай меҳнат қилаётган тиббиётчиларнинг, ҳуқуқ-тартибот органлари ходимларининг фидойилигини қадрлайлик. Улар керак бўлса, ҳафталаб оиласи бағрига бормасдан ишлашмоқда. Айрим кимсалар эса ҳамма шароити муҳайё бўлса-да, уйидан зерикиб, атайин кўчага чиқаётганига нима дейсиз?

Ўзбекистон Республикаси Жиноят, Жиноят-процессуал ҳамда Маъмурий жавобгарлик тўғрисидаги кодексларга мувофиқ фуқаролар карантин тадбирлари ва санитария қоидаларини бузганликлари учун жаримага тортиладилар. Маъмурий жавобгарлик тўғрисидаги кодекснинг
54-моддаси 2-қисмига биноан фуқароларнингкарантин даврида белгиланган мажбурий қоидаларни бузишса, тегишли равишда жавоб берадилар.

Бугунги карантин талабларини, санитарияга оид қонун ҳужжатларини ёки эпидемияга қарши кураш қоидаларини бузаётган шахслар (одамларнинг оммавий касалланишига олиб келса) Жиноят қонунчилигига кўра11 миллион 150 минг сўмдан 22 миллион 300 минг сўмгача миқдорда жарима солиш ёки 5 йилгача муайян ҳуқуқдан маҳрум қилиш ёки 2 йилгача аҳлоқ тузатиш ишлари ёки 1 йилдан 3 йилгача озодликдан маҳрум қилиш билан жазоланади.

Аҳолини саросимага солувчи ваҳима тарқатганлик учун ҳам жиноий жавобгарлик белгиланган. Жумладан, бундай ҳолатларда 44 миллион
600 минг сўмдан 89 миллион 200 минг сўмгача жарима ундирилиши ёки
3 йилгача аҳлоқ тузатиш ишлари ёхуд 1 йилдан 3 йилгача озодликни чеклаш ёки 3 йилгача озодликдан маҳрум қилиш жазолари қўлланилади. Ваҳима чақиришга қаратилган материалларни тайёрлаш ва уларни тарқатиш мақсадида сақлаш ҳамда ҳар қандай шаклда тарқатиш 5 йилдан 8 йилгача озодликдан маҳрум қилиш билан жазоланади.

Каранавирус касаллигининг тарқалишини олдини олиш мақсадида вилоят бўйича жами 37 та назорат пунктлар, шундан 5 та блок-пост, 3 та ЙПХ маскани ҳамда 29 та тўсиқ постлари ташкил қилинган.

Карантин қоидаларини бузган 5135 нафар фуқароларга маъмурий баённомалар расмийлаштирилди. Ҳужжатларни қалбакилаштиришга оид 3 та ҳолатлар бўйича жиноят ишлари қўзғатилди.

Юқорида қайд этилган нохуш ҳолатларга тушиб қолмаслик ўз қўлимизда. Синовли кунларни биргаликда енгиш учун бир-биримизга кўмаклашмоғимиз зарур. Бунинг учун бир-биримизни асраш йўлида уйда қолиб карантин қоидаларига тўла амал қилайлик.

Вирус хавфи, тарқалиши ва фожеавий оқибатлари инсон ҳаётини мудҳиш тарафга буриб юбориши ҳеч гап эмас. Бепарволик ва хавфни ҳис қилмаслик тузатиб бўлмас хатоларни келтириб чиқаради.Азиз, юртдошлар, ўзингиз, ота-онангиз ва фарзандингизнинг эртаси учун масъул эканлигингизни унутманг.

Ҳаётбек МАКСУДОВ,

вилоят адлия бошқармаси бўлим бошлиғи.