Андижон 24

«B E R L I N E R Z E I T U N G» ДА ЭЪЛОН ҚИЛИНГАН «ШАРҚ ҚАҲРАМОНИ»


08.04.2020   4415

Германия пойтахтини озод қилишда жасорат кўрсатган ҳамюртимиз Саидаҳмад Исаев ҳақида Берлин газетасида “Шарқ қаҳрамони” сарлавҳали мақола эълон қилинган эди.

Андижон вилоятининг собиқ Ворошилов (ҳозирги Қўрғонтепа) туманидан кўнгиллилар қаторида фронтга отланган ўспирин йигит, то уруш тугагунга қадар қўлида қурол билан жанг қилган.

-Асли урушнинг сокин куни бўлмайди, - хотирлайди нуроний. Айниқса, Москва мудофааси қақшатгич зарбалар билан ёдда қолган. Ўшанда ўзбек йигитларидан ташкил топган танкларга қарши курашиш қисмда политрук эдим. 1941 йилнинг қаҳратонида гитлерчиларнинг бир нечта ҳамласини қайтариб, қарши ҳужумга ўтгандик.

Киев, Одесса, Днепропетровск, Кишинев сингари шаҳарларни озод қилишда, Европа мамлакатлари пойтахтларини душмандан халос этишда олдинги сафларда бўлди. Оловли йўлларни босиб ўтиб, етти марта яраланганига қарамай, Ғалаба кунини фашистлар пойтахтида кутиб олди.

Отаси Исабек Режабалиев ҳам ҳарбий бўлган. Эскадрон командири сифатида Уралда рус казакларига қарши жанг қилган. Онаси Шарифахон Шералиева Ойим тумани партия қўмитасида хотин-қизларининг етакчиси лавозимида ишлаган.

Демобилизациядан сўнг партия мактабини тамомлаган Саидаҳмад ака вилоят ички ишлар бошқармасида самарали фаолият кўрсатди. Истеъфога чиққан полковник Андижон давлат университетида ишлади. Ёшларга таълим-тарбия бериш баробарида номзодлик диссертациясини ёқлади.

Августнинг 25 санасида 96 ёшини нишонлайдиган С.Исаев ҳозир ҳам бардам, руҳи тетик, хотираси яхши. Фарзандлари, набиралари ва чеваралари даврасида умргузаронлик қилмоқда.

-Президентимизга раҳмат, - дейди қўлларини дуога очиб. – Ғалабага атаб, уруш қатнашчилари ва ногиронларига 10 миллион сўмдан пул берилаётгани биз кабиларга бўлган ғамҳўрликдан нишона.

Зуҳриддин Умрзоқов.