Андижон 24

АНДИЖОНДА ШИФО ТОПГАНЛАР 4 ТАГА КЎПАЙДИ


23.04.2020   2315

Вилоят юқумли касалликлар шифохонасида даволанаётганлардан яна 4 нафари тузалди.

Барчаси вилоятимизда фуқароларидир. Тиббиёт ходимларининг кунни тунга улаб қилган меҳнатларининг самараси билан инфекциядан халос бўлганлар “Шифо нур” хусусий тиббиёт марказида карантинга олинди.

Давр қаҳрамонларини ҳар қанча таърифласак, арзийди. Шифохонанинг аҳил жамоаси мартнинг иккинчи ярмидан бошлаб падемияга қарши курашга сафарбар этилди. Ҳар 14 кунда навбатчиликка турганлар кунига олти соатдан алмашиб, беморларни назоратсиз қолдирмадилар. Ҳар соатда иситмасини ўлчашдан тортиб, зарур тиббий муолажаларни юқори даражадаги маҳорат билан бажардилар.

Энг олижаноб касб ээгалари соғайганларни гулдасталар билан, яхши тилаклар билдирган ҳолда кузатдилар.

-Натижадан бағоят ҳурсандмиз, - дейди юқумли касалликлар шифохонаси шифокори Мияссархон Гаипова. – Кеча 26 нафар бемор даволаниб чиққан бўлса, бугун яна тўрт нафари соғломлар қаторига қўшилди.Шу кунгача эса 51 та ҳамюртимиз даволандиб чиқди. Яратилган шароитлар, тиббиёт ходтимларига кўрсатилаётган ғамхўрлик учун Президентимизга, вилоятимиз ҳокимига миннатдорлик билдираман.

Мияссархон шифокорлар оиласидан. 12 апрелда набирали бўлган бўлса, 13 апрелда карантин ҳолатида ишлашга ўтди. Жажжи Муҳаммадризонинг дийдорини кўргани улгурмади.

Соғайиб чиққанларда ҳам бир олам қувонч ва ҳаяжон. “Коронавирус юқтириб олганимда қандай ҳолатга тушганимни сўз билан айтиб беролмайман. Соғлик - энг катта бойлик эканини англадим. Барча-барчага каттадан катта раҳматлар айтаман”, деди уларнинг бири.

С.Хўжаев.