Президент Шавкат Мирзиёев АҚШдаги Колумбия университетининг профессори этиб тайинланган Азиза Шоназаровани Ўзбекистон ёшлари учун чинакам ибрат намунаси деб атади. Давлат раҳбарининг матбуот хизмати тарқатган ахборотга кўра, Президент бу ҳақда Халқаро хотин-қизлар куни муносабати билан 7 март куни ўтказилган байрам тадбирида айтиб ўтган.

Яқинда оммавий ахборот воситалари орқали истеъдодли ёш олима Азиза Шоназарованинг Америка Қўшма Штатларидаги нуфузли Колумбия университетининг профессори этиб тайинлангани ҳақида хушхабар тарқалди.

Пойтахтимизнинг Қорақамиш даҳасида вояга етиб, Тошкент шарқшунослик институтида, кейинчалик Польша ва АҚШдаги машҳур университетларда таълим олган Азизахон 32 ёшида тарих ва диншунослик йўналишида фан доктори бўлгани, 500 та талабгор орасида конкурсда ғолиб чиқиб, ана шундай юксак илмий даражага эришгани олқишга сазовордир.

Бу синглимизнинг айни вақтда яхши оила бекаси ва она экани, араб, форс, турк, рус, инглиз, француз, немис, поляк тилларида эркин мулоқот қилиши, эришаётган юксак натижалари мамлакатимиз ёшлари учун чинакам ибрат намунаси бўлади, деб ишонаман.

Азизахон ўз хурсандчилигини юртдошлари билан баҳам кўриш учун олис йўл босиб, АҚШдан Ўзбекистонга етиб келди. Келинглар, ёш олимамизни самимий табриклаб, унга янада улкан ютуқлар тилайлик.

Шавкат Мирзиёев, Ўзбекистон Президенти

Қайд этиш жоиз, профессор Азиза Шоназарова Ўзбекистон Президентининг 7 мартдаги Фармонига мувофиқ «Дўстлик» ордени билан мукофотланди.

Байрам тадбиридан сўнг у «Kun.uz» мухбирига берган интервьюсида у орден билан тақдирланишидан бехабар эканлигини, мукофотни олаётганида Президентимиз унга: «Азиза, биз сиз билан фахрланамиз. Ўзбекистонга тез-тез келиб туринг» деганини маълум қилди.