АНДИЖОН (auz.uz). – 29 июль, душанба куни, Андижон вилоят ихтисослаштирилган олимпия резервлари мактаб-интернати ва Андижон давлат университетининг хорижий тиллар факультети спорт иншоотида олий ўқув муассасаларининг бакалавриат таълим йўналиши бўйича тест синовлари бошланди. Бу ҳақда auz.uz сайти мухбирлари хабар бермоқда.

Давлат тест маркази вилоят бўлими тақдим этган маълумотларга кўра, вилоятдаги олий таълим муассасаларига кириш учун 75 минг 261 нафар абитуриент рўйхатдан ўтган. Уларнинг 53 минг 941 нафари кундузги, 21 минг 320 нафари сиртқи таълим шаклига ҳужжат топширган. Бу кўрсаткич ўтган йилга нисбатан 24 минг 525 нафар ёки 48.3 фоизга кўпайган.

Танлов кўрсаткичлари бўйича бир ўринга ўртача 13.6тани ташкил этган. Қабул кўрсаткичи бўйича бир ўринга Андижон машинасозлик институтининг Иқтисодиёт йўналишига 44.6, АДУ Тарих йўналишида 41.6, Педагогика ва психология йўналишига 38, Экология ва атроф муҳит муҳофазаси йўналишига 34.3, жисмоний маданият йўналишига 34.5 тадан тўғри келган.

Эслатиб ўтамиз, давлатимиз раҳбарининг юқоридаги қарорига асосан бу йил 4 та олий таълим муассасаларига бакалавр тайёрлаш бўйича 73 та кундузги таълим йўналишларга 3 минг 965 та, 29 та сиртқи таълим йўналишларига 1 минг 240 та қабул квотаси ажратилган.